Verhalen/gedichten van
Den Ham ('n Ham)

Zonder protest, mangs misschien zachies bloatend
goat ze geloaten met de scheerder met.
As ze zich zeer doot, deur zich te verreuren,
mekkert ze angstig, mar zonder verzet

De schere geet, met vakmanschop en iever,
oaver het schoap, det stil en stom doar lig.
De dikke vacht löt lös en hoaste nakend
lig doar het schoap: de scheerder dee zien plicht.

Mar as het schoap 'ebrach’ wodt noar de kudde
woar het zich thuus veult en neet zo alleen,
vernemp het wel: ’t is misschien effen wennen,
mar ’t valt hum met, tenminste zo te zeen!

Het hef der baat biej, dat de dikke vachte
wier plaatse maakt veur ’t nieje wollen kleed,
woarvan a’j noa korte tied op ’t kale lichaam
alwier de eerste hoaren greuien zeet.

As dan van ’t vacht de wolle wödt ‘espönnen
en ’t goaren tut klerazie wödt verwarkt,
dan deent de wolle oonsleu weer met warmte
zonder dat ’t schoap doar hinder van bemarkt.

As wiejleu ôk een aander met magt delen,
a’w met de wille geeft van oojnze oaverdoad,
dan zie’w ôk meestal zelf gelukkig,
want warmte stroalt wierumme, a’j oen plicht verstoat!

Henk Pool (1925-2001)
Uit: Zunnestroaltie. Amersfoort, Artica, 1998